Аллоҳнинг ёлғиз Ўзига ҳамд бўлсин!
Ортидан набий келмайдиган зот – саййидимиз ва Набийимиз Муҳаммадга саловоту салом бўлсин!
Аммо баъду:
Робитатул Оламил Исломийнинг Ислом Фиқҳи Академияси кенгаши ўзининг Маккаи Мукаррамада ҳижрий 1409 йил 13 Ражаб, душанба кунидан ҳижрий 1409 йил 20 Ражаб, якшанба кунигача (милодий 1989 йил 19 26 февраль) бўлиб ўтган ўн биринчи мажлисида оқова сувларнинг тозаланганидан кейинги ҳукми ҳақидаги «У билан таҳорат ва ғусл қилиб, нопокликни кетказса бўладими? У билан нажосатни кетказса бўладими?» деган саволни кўриб чиқди.
Кимёвий йўллар билан тозалаш бўйича шуғулланувчи мусулмон, адолатли, содиқлик ва омонатдорликда ишончли мутахассислардан сўраб-суриштирилганидан кейин, мазкур сувдан нажосатни кетказиш тўрт босқичда: сизилтириб, ҳаводан ўтказиб, микробларни ўлдириб ва хлор билан зарарсизлантириб амалга оширилиши маълум бўлди. Шундай қилинганда сувнинг таъмида, рангида ва ҳидида нажосатнинг асари қолмайди.
Кейин Академия қуйидаги қарорни қабул қилди:
Агар оқова сувлар зикр қилинган ва шунга ўхшаш йўллар билан тозаланса ҳамда таъмида ҳам, рангида ҳам, ҳидида ҳам нажосатнинг асари қолмаса, пок сувга айланади. У билан бетаҳоратликни ва нажосатни кетказиш жоиздир. Бунга асос «Кўп сувга нажосат тушган бўлса, ўша нажосатнинг ундан кетиши ҳамда асари қолмаслиги ила у сув покланади» деган фиқҳий қоидадир.
Саййидимиз Муҳаммадга, оила аъзоларига ва саҳобаларига саловоту саломлар бўлсин!
Оламларнинг Робби Аллоҳга ҳамд бўлсин!
Фатво ва илмий баҳслар
бўйича Европа мажлиси